Mala Ishkachi Ingali Dasali / मला इष्काची इंगळी डसली
मी एकलीच निजले, रातीच्या अंधारांत,
नको तिथंच पडला अवचित माझा हात
हाताखालती नांगा काढुन वैरिण ती बसली
ग बाई मला, इष्काची इंगळी डसली
बाई ग, बाई ग
मारली किंकाळी, कळ लई आली
उरी घामानं भिजली चोळी
अंगाअंगाची काहिली झाली
सांगा ही कळ कसली
साऱ्या घरात फिरले बाई ग
मला औशिद गावलं न्हाई ग
तंवर कुणाची चाहूल आली
खूण खुणेला पटली
ह्या इंगळीचा कळला इंगा
खुळ्यावाणी मी घातला पिंगा
मंतर घाला हलका हलका
नार चुकून फसली
गीत: जगदीश खेबूडकर
संगीत: राम कदम
स्वर: उषा मंगेशकर
चित्रपट: पिंजरा
गीत प्रकार: चित्रगीत, लावणी
