Mala Lagali Kunachi Uchaki / मला लागली कुणाची उचकी
आली आली सुगी म्हणून चालले बिगीबिगी
गोष्ट न्हाई सांगण्याजोगी
कुणी गालावर मारली टिचकी
मला लागली कुणाची उचकी
कुणाची ग कुणाची? ह्याची का त्याची? लाजू नको, लाजू नको
तरणीताठी, नार शेलाटी, चढले मी बांधावर
अटकर बांधा, गोरा गोरा खांदा, पदर वाऱ्यावर
फडामध्ये चाहूल, वाजलं त्याचं पाऊल
माझ्या उरात भरली धडकी
मला लागली कुणाची उचकी
निजले डाव्या कुशी, हाताची उशी, करून मी कशी
वाऱ्याच्या लाटा, थंडीचा काटा, मनात न्यारी खुशी
सपनात आला, त्यानं छेडलं बाई मला
त्याच्या डोळ्याची नजर तिरकी
मला लागली कुणाची उचकी
उठून सकाळी, लई येरवाळी, गेले पाणोठ्यावरी
उन्हात बसले न्हात, अंगाला पानी गुदगुल्या करी
पाण्यामध्ये दिसं, त्याचं लागलं मला पिसं
त्यानं माझीच घेतली फिरकी
मला लागली कुणाची उचकी
गीत: जगदीश खेबूडकर
संगीत: राम कदम
स्वर: उषा मंगेशकर
चित्रपट: पिंजरा
गीत प्रकार: चित्रगीत, लावणी
