Shodhito Radhela Shrihari / शोधितो राधेला श्रीहरी
शारद पुनवा शांत चांदणे कालिंदीच्या तटी
गोपी जमल्या रास रंगला कदंबतरूतळवटी
दिसेना सखी लाडकी परि
शोधितो राधेला श्रीहरी !
इथे पाहतो तिथे पाहतो
मध्येच थबकुन उभा राहतो
बासरी मुकीच ओठांवरी
शोधितो राधेला श्रीहरी !
दरवळलेल्या कुंजानिकटी
इथेच ठरल्या होत्या भेटी
कशी ती वेळा टळली तरी
शोधितो राधेला श्रीहरी !
काय वाजले प्रिय ते पाऊल
तो तर वारा तिची न चाहूल
भास हो फसवा वरचेवरी
शोधितो राधेला श्रीहरी !
गीत: शान्‍ता शेळके
संगीत: अशोक पत्की
स्वर: सुरेश वाडकर
चित्रपट: हेच माझे माहेर
गीत प्रकार: चित्रगीत
