Dhundit Gau Mastit Rahu / धुंदीत गाऊ मस्तीत राहू
धुंदीत गाऊ मस्तीत राहू
छेडीत जाऊ आज प्रीत साजणा
थंडी गुलाबी हवा ही शराबी
छेडीत जाऊ आज प्रीत साजणी
रुपेरी उन्हांत धुके दाटलेले
दुधी चांदणे हे जणु गोठलेले
असा हात हाती तू एक साथी
जुळे आज ओठी माझ्या गीत साजणा
दंवाने भिजावी इथे झाडवेली
राणी फुलांची फुलांनीच न्हाली
ये ना जराशी, प्रिये बाहुपाशी
अशी मीलनाची आहे रीत साजणी
अशी हिरवळीची शाल पांघरावी
लाली फळांची गाली चढावी
हळूहळू वारा झंकारि तारा
आळवित प्रीतिचे संगीत साजणा
जळी यौवनाच्या डुले हा शिकारा
असा हा निवारा असा हा उबारा
अशा रम्य काली नशा आज आली
एकांत झाला जणू आज पाहुणा
गीत: जगदीश खेबूडकर
संगीत: एन्‌. दत्ता
स्वर: महेंद्र कपूर, आशा भोसले
चित्रपट: बाळा गाऊ कशी अंगाई
गीत प्रकार: युगुलगीत, चित्रगीत
