Dubhangun Jata Jata / दुभंगून जाता जाता
दुभंगून जाता जाता मी अभंग झालो !
चिरा चिरा जुळला माझा; आत दंग झालो !
सल जुनेच सलता सलता सुखावून गेले !
अन्‌ हळूच गुणगुणती हे वळ न मोजलेले !
कशी कथा सरता सरता पूर्वरंग झालो !
किरण एक धरुनी हाती मी पुढे निघालो !
अन्‌ असाच वणवणताना मी मला मिळालो !
सर्व संग सुटले, माझा मीच संग झालो !
ज्ञानदेव लिहुनी गेले ओळ ओळ भाळी !
निमित्तास माझे गाणे, निमित्तास टाळी !
तरू काय? इंद्रायणीचा मी तरंग झालो !
गीत: सुरेश भट
संगीत: रवि दाते
स्वर: सुरेश वाडकर
गीत प्रकार: भावगीत
