Ja Ja Ranichya Pakhara / जा जा रानीच्या पाखरा
जा जा रानीच्या पाखरा, तू जा रं भरारा
तुला घालिते चारा, तुला घालिते चारा
द्यावा संदेसा म्हायेरा, जा रं भरारा !
दूर डोंगरापल्याड नदीकाठी माझा गाव
तिथं नांदतोया द्येव नरसुबाराव
लहान-थोरांसी मायेचा त्योच आसरा !
बाई म्हयेराचं थोरपन वानु कसं?
पुन्यवंत माझं मायबाप द्येव जसं
गंगा निर्मळ मायेचा व्हातुया झरा !
माझ्या खुशालीचा सांगावा दे माउलीला
पड पाया तिच्या सांग येती याद मला
तुला भेटाया जीव हुतो माझा घाबरा !
गीत: शान्ता शेळके
संगीत: आनंदघन
स्वर: लता मंगेशकर
चित्रपट: तांबडी माती
गीत प्रकार: चित्रगीत