Madhu Ithe An Chandra Tithe / मधु इथे अन्‌ चंद्र तिथे
मधु इथे अन्‌ चंद्र तिथे झुरतो अंधारात
अजब ही मधुचंद्राची रात
एक चंद्र अन्‌ अगणित तारे, दो हृदयांवर किती पहारे
हवी झोपडी, मिळे कोठडी सरकारी खर्चात
अजब ही मधुचंद्राची रात
माहेराला सोडुन फसले, नशिबी आले सासर असले
ताटातुटीने सुरेख झाली संसारा सुरवात
अजब ही मधुचंद्राची रात
किती पाहुणे किती निमंत्रित, जमले सारे एका पंक्तीत
अशी निघाली लग्‍नानंतर वार्‍यावरती वरात
अजब ही मधुचंद्राची रात
गीत: ग. दि. माडगूळकर
संगीत: एन्‌. दत्ता
स्वर: महेंद्र कपूर, आशा भोसले
चित्रपट: मधुचंद्र
गीत प्रकार: युगुलगीत, चित्रगीत
