Rangavi Re Chitrakara / रंगवी रे चित्रकारा
गुंजते सर्वांग माझे गोड उठती झंकृती
रंगवी रे चित्रकारा हीच माझी आकृती
काजळावाचून डोळे आज दिसती देखणे
गोरट्या या अंगरंगा न्हाऊ घाली चांदणे
अर्पणाच्या ओंजळीला आज लाभे स्विकृती
हीच माझी आकृती !
दाटला रे हर्ष ओठी हळूच वळते हनुवटी
रोमरोमी या शरीरी लाजरीची रोपटी
उमज माझी मज पडेना, स्वप्‍न की ही जागृती
हीच माझी आकृती !
अंगलटीची ऐट झाली आज काही वेगळी
मधुप पुढती थांबलेला फूल लपवी पाकळी
अधीरले मी मीलनासी परि न करवे ती कृती
हीच माझी आकृती !
गीत: ग. दि. माडगूळकर
संगीत: प्रभाकर जोग
स्वर: आशा भोसले
चित्रपट: घरगंगेच्या काठी
गीत प्रकार: चित्रगीत
