Tya Premachi Shapath Tula / त्या प्रेमाची शपथ तुला
ज्या अनुभूतीच्या स्पर्शाने अर्थ लाभला जगण्याला
त्या प्रेमाची शपथ तुला
दोन दिशांचे दोन प्रवासी, एका ठायी का आलो?
हात गुंफुनी दोन घडी का घोट चांदण्याचे प्यालो?
काय तोडण्यासाठी सखये धागा धागा जोडियला?
त्या प्रेमाची शपथ तुला
सहवासातील खोटे रुसणे
अबोल्यातले ते झुरणे
मौनामधुनी मोहरणारे अहेतुकाचे ते हसणे
त्या हसण्याची त्या रुसण्याची त्या झुरण्याची शपथ तुला
मनोगतांची अधुरी गीते
मनोरथांची नि:श्वसिते
ती वचने त्या आणा-शपथा सारे का फसवे होते
त्या श्वासांची त्या गीतांची त्या शपथांची शपथ तुला
गीत: सुधीर मोघे
संगीत: श्रीधर फडके
स्वर: रंजना जोगळेकर, सुरेश वाडकर
चित्रपट: लक्ष्मीची पाऊले
गीत प्रकार: चित्रगीत, युगुलगीत
