Vikat Ghetala Shyam / विकत घेतला श्याम
नाही खर्चिली कवडीदमडी, नाही वेचला दाम
विकत घेतला श्याम, बाइ मी विकत घेतला श्याम !
कुणी म्हणे ही असेल चोरी
कुणा वाटते असे उधारी
जन्मभरीच्या श्वासाइतुके मोजियले हरिनाम !
बाळ गुराखी यमुनेवरचा
गुलाम काळा संताघरचा
हाच तुक्याचा विठ्ठल आणि दासाचा श्रीराम !
जितुके मालक तितुकी नावे
हृदये तितुकी याची गावे
कुणि न ओळखी तरीही याला दीन अनाथ अनाम !
गीत: ग. दि. माडगूळकर
संगीत: सुधीर फडके
स्वर: सुधीर फडके, आशा भोसले
चित्रपट: जगाच्या पाठीवर
गीत प्रकार: युगुलगीत, चित्रगीत
