Ga Bai Bai Jhombato Garava / ग बाई बाई झोंबतो गारवा
चंदनाच्या पलंगी शेज मखमली लाल
दोन उशा रेशमी, गरम लोकरी शाल
पर झोप नाही आली जागरण झालं काल
रंग महाली ऊब असून का काटा फुलतोय नवा
ग बाई बाई झोंबतो गारवा !
अंग नाजूक ग मला रुतली उशी
आली जांभई ग निजले बदलून कुशी
खिडकीमधुनी खुणवत होता चवथीचा चांदवा
ग बाई बाई झोंबतो गारवा !
रागारागानं गेले मी कोन्यात ग
चिंब न्हाऊन मी पाहिलं ऐन्यात ग
मनात माझ्या घुमु लागला मदनाचा पारवा
ग बाई बाई झोंबतो गारवा !
आज आला तुम्ही माझी केली कदर
झाली नजरानजर घेते लाजून पदर
खुशाल यावं जवळ घ्यावं धरून हात आडवा
ग बाई बाई झोंबतो गारवा !
गीत: जगदीश खेबूडकर
संगीत: राम कदम
स्वर: आशा भोसले
चित्रपट: गणानं घुंगरू हरवलं
गीत प्रकार: लावणी, चित्रगीत
